الرادار المكشوف

مش عارف ابدأ كلامى منين والله

بس حاجه بقالى كتير ملاحظها وكنت عايز اتكلم عليها بس ساعتها مكنتش بكتب وكده

بس فعلا هى حاجه تغيظ وتخلى الواحد مندهش جدا ويقول " طب لما هوا كده طب ايه لزمتها بئه "

انا بتكلم على موضوع رادارات السرعة اللى بتبقى عالطرق دى

يمكن انا كاتب عنوان الموضوع الرادر المكشوف وده فعلا عشان هوا رادار مكشوف

هحكيلكو حاجه حصلت النهارده هتوضحلكو انا قصدى ايه

انا رايح شغلى عادى زى ما بروح كل يوم وراكب ميكروباصات رابعه من موقف العاشر

والسواق طبعا حدث ولا حرج على السرعة الغبيه والكبس على العربيات اللى قدامه والغرز والكلام اللى انتو عارفينه ده كله واللى سواقين الميكروباصات مشهورين بيه

بس طبعا مش هتكلم . اصل هتكلم اقوله ايه ؟ ما علينـــــا ..

المشكله بئه فى ايه ان اول ما عدى من شيراتون وفى اول طريق الاوتوستراد عند المطار كده فيه واحد محترم قاعد حاطط رجل على رجل وقاعد بالرادار .. فجأة بعد ما كان السواق سايق بسرعه جنونيه لقيته هدى سرعتة وبئه ماشى على 40 كم ولا حاجه

قبل ما يدخل على الرادار طبعا انا فهمت ان فيه رادار جاى لأن دى مش اول ولا اخر مره هيحصل فيها حاجه زى كده

واول ما عدى من الرادار راح فاتح فى السرعه تانى ..

يمكن فيه جملة كان كاتبها احد الاشخاص فى وصف الشارع المصرى . كان كاتب

" من توابع روح التعاطف أيضا أن تلاحظ السيارات القادمة فى الاتجاه المقابل على طرق السفر كلها بدون استثناء (عماله تقلب لك نور) ستعرف فورا أنه فيه رادار  أو لجنة رادار على الطريق وأن تقليب النور ما هو إلا تحذير (خُد بالك يا بنى وعلى مهلك)."

السؤال هنا : طب ايه لزمة الرادار لما الناس عارفه مكانه وبتيجى قبله وتهدى وبعد ما تعدى منه تجرى بجنون تانى

احنا بنضحك على بعضينا يعنى ولا ايه ؟؟

لا وكمان اكتر ناس فاقسين موضوع الرادار ده هما اكتر ناس بتجرى بسرعة وبتاخد غرز وبتكبس وبتسوق بطريقه خطر

يعنى الناس اللى المفروض تقع فى الرادار ده وتدفع غرامة عشان تحترم نفسها هى الوحيده اللى بتفلت منه

واللى بيقع فيه ناس عاديه ممكن تكون سواقتة محترمه ومش بيكبس ولا بيعمل بس لما لقى الطريق فاضى والعربية مسعداه جرى شويه

موضوع يغيظ اوى فعلا .. بس هنعمل ايه هى دى بلدنا وهى دى مصر